Гісторыя Беларусі за пяць хвілін. Мультфільм пра «шалёны беларускі народ»
Тэги к статье: Александр Помидоров, Будзьма беларусамі!, История Беларуси за 5 минут, Лявон Вольский, Юлия Ляшкевич, Юлия Рудицкая
Гісторыя Беларусі за пяць хвілін. Мультфільм пра «шалёны беларускі народ»
мая 28, 2011
Не, гэта зусім не прапанова кшталту «Cусветная філасофія за тры гадзіны». Рэч у тым, што кампанія «Будзьма беларусамі!» і партал TUT.BY знялі першы анімацыйны фільм паводле гісторыі Беларусі.
За чатыры з паловай хвіліны, глядач убачыць на экране ўсё, што адбывалася ў беларускай гісторыі: пачынаючы са стварэння свету, і сканчваючы 1991-м годам.
Анімацыя Юліі Рудзіцкай трымае гледача ўсе пяць хвілін — прапусціць нельга ні секунды, таму што сюжэт праносіцца па гісторыі з хуткасцю экспрэса. У якасці саўндтрэка — спецыяльны трэк з элементамі хіп-хопу, які напісаў Лявон Вольскі, а «прачытаў» Аляксандр Памідораў. Таму і ўспрымаць стужку можна і як мультфільм, і як кліп.
— Мы хацелі зацікавіць людзей беларускай гісторыяй, — кажа саўтар ідэі праекта Юлія Ляшкевіч. — У мультфільм у выніку ўвайшлі далёка не ўсе важныя падзеі беларускай гісторыі, хай людзі спрачаюцца, абмяркоўваюць, цікавяцца і дадаюць нешта сваё.
І насамрэч, у стужку не трапілі ні Сталін, ні Гітлер (якіх ад самага пачатку «ўпісаў» Лявон Вольскі), ні Ігнат Дамейка, ні N.R.M. — у першапачатковай задуме гэтыя асобы планаваліся. Але аўтары вырашылі не перагружаць сюжэт.
Лейтматыў стужкі — беларусы не такія ўжо сціплыя, ціхія і памяркоўныя, як яны прывыклі пра сябе казаць. Тым больш, што «памяркоўным» сябе мала хто лічыць, а вось калі гаворка заходзіць пра беларусаў агулам — тады ўжо і «ціхія», і «цярплівыя». Мультфільм жа паказвае, што беларусам не проста ёсць чым ганарыцца, тут ужо фігуруе «шалёны беларускі народ».
Падзеі сканчваюцца ў 1991-ым годзе, а далей кожны можа сфармуляваць гісторыю сам (дарэчы, такая прапанова насамрэч ёсць на сайце «Будзьма») — большасць гледачоў, на якіх разлічаны фільм, бачылі, а то і прынялі актыўны ўдзел у стварэнні найноўшай гісторыі.
Стваральнікі мульціка хочуць верыць, што стужку можна будзе паказаць на якім-небудзь з дзяржаўных каналаў, але, на вялікі жаль, наўрад ці які з дзяржаўных каналаў пакажа ў эфіры мультфільм, дзе словы «братні рускі народ» тлумачаць слова «захопнікі», а ўвесь сюжэт суправаджаюць бел-чырвона-белыя сцягі. З іншага боку, тое што зараз паказваюць гэтыя каналы ў асноўным не мае дачынення ні да гісторыі, ні, тым больш, да Беларусі.
Юрась Ускоў
Тэги: Александр Помидоров, Будзьма беларусамі!, История Беларуси за 5 минут, Лявон Вольский, Юлия Ляшкевич, Юлия Рудицкая